Te Pou-o-Mangataawhiri: Ngā Toa 2026
Nā Te Pouārahi o Te Whare Haka o Tainui, nā Haani Huata-Allen, ngā kupu whakamiha e whai ake nei.
Ka whakamānawatia a Te Arikinui Kuini Ngā wai hono i te po, te pītau whakareia o te waka o Tainui, te taumatua o Te Whare Haka o Tainui. E Rangi, kei taku ariki, i rangatira tā tātou kaupapa i te roanga o tō noho ki te tautoko i ngā kapa katoa. Rire rire hau, paimārire.
Kei ngā ringa, kei ngā waewae o ngā kaupapa maha o Te Whare Haka o Tainui e kore e mimiti te puna whakamiha i ngā mahi nunui, i ngā mahi roroa i oti rā i a koutou i eke ai tā tātau kaupapa ki te taumata i wawatahia ai. Ki te kore koutou ka kore Te Whare Haka o Tainui, ka mutu! Hīnei anō te mihi e rere ana i ngā au katokato, i ngā au o aroha.
Huri atu ki a koutou ngā kapa rangatira o te whare, ki ngā poupou o te whare, me pēwhea ai te whakakupu i ngā tauwharewharenga o te ngākau? Kei ngā uri a Hinerēhia, a Tānerore ka whai atu i ngā kupu a Tā Tīmoti, “kua tū te ringa, kua takahi te wae, kua putē te karu, kua whiua te kupu, ka kī noa ake ahau i konei he mihi nui, he mihi mutunga kore”.
Kei aku huānga, Rereahu, Ngāti Maniapoto me ōna hapū maha, kua pua mai ai te kōwhara kia whāinumia ai e te marea, e Ngā pua o te kōwhara, e mihi ana.
He iti nā Mōtai, Mōtai tangata rau! Kua whakareia te makiu tangata ki te hinu raukawakawa, Raukawa ki uta, Raukawa ki tai, e mihi ana.
Mai i Maungatautari ki Pirongia, ko tōku whānau, tōku haona kaha, tōku piringa kua puta, kua ora, e Te Haona Kaha e mihi ana.
Kei te hua o te rengarenga, o te kawariki nā koutou anō tēnei whare i hanga, kia tū pakari ai ngā raukura, Āwhina i te kaupapa, e mihi ana.
Kei te whakakanohi o te Tumuaki, e te kapa tuakana o te kaupapa, kāore i tūohu noa, i whāia te iti kahurangi. Nō reira e Te Iti Kahurangi e mihi ana.
Tau atu ana ki te toa whakaihu waka o te whakataetae nei, ngā ringaringa me ngā waewae o te marae o te motu, kei whea mai! E Te Pou o Mangatāwhiri, i tēnei tō rua tekau tau, e mihi ana.
Ko koutou katoa e whakakanohi nei i Te Whare Haka o Tainui ki runga o te papa i hoki whenua mai, Hopuhopu whakatuuria ake ko Taakiri Tuu Te Matatini, Tainui waka, ki te hoe!
